"Water - Health - Environment"

Saturday, September 14, 2002

Projetu Bé-Mos ba Komunidade Hekar ho Lisaiko

Governo Timor Leste liu hosi WSS no Asian Development Bank (ADB) aprova proposal Aplimentec nian atu hala’o konstrusaun iha aldeia Hekar no Lisaiko iha Suco Dato Foho Distritu Liquica. Assina kontratu ba projetu ne’e halo iha loron 11 Setembru 2002 hosi NGO Aplimentec no WSS inklui representa ADB. Iha akordu ne’e, projetu ne’e hetan aprova ho orsamentu hamutuk US$ 29, 875.29.

Tuir programa, projetu ne’e sei hahu iha fulan Setembru nia laran no bá remata iha fin fulan Desembru 2002. Tuir Supervisor Geral Aplimentec nian, Sr. Paulino Alves hatetean katak, projetu dada be-mos mai aldeia rua ne’e ho distansia kilometro haat, ne’e inklui ona instalasaun kanu no public tap. Nia hatutan katak, iha programa ne’e, sira la’os fo atensaun deit ba dada be, maibe mós sira sei fo treinamentu tekniku ba komunidade, forma komitiva Be-mos bá sustanibilidade be nian, no mós hala’o sosialisaun kona-ba saude iha komunidade laran.

Iha fatin hanesan, Director Aplimentec, Sr. Justiano hateten katak, nia espera atu programa ne’e bele lori benefisiu ba povo nia moris (ema 800 ho familia 300 resin iha aldeia rua nia laran), liu-liu atu hadia sira nia saude no ajuda hodi desenvolve area agrikultura iha base. Nune’e, nia husu atu komunidade atu kopera no fo apoia ba tekniku Aplimentec nian, nune’e sira bele halo remata projetu ne’e ho diak no susesu.