Prosesu Adat antes hahu Programa GGP

Aplimentec Foundation servisu hamutuk ho Xefe Suco no Lia-Nain Suco Darulete, Posto Liquica, municipio Liquica hahu halo prosesu adat iha bee-matan antes realiza programa konstrusaun ba bee-matan. Programa ida ne'e realiza hanesan parte ida husi uza kostume komunidade nian, tuir sira nia lisan no fiar.

Xefe Suco Darulete informa katak, prosesu adat ida ne'e atu husu lisensa ba bee-nain, rai-nain, no be lulik. Lisensa ne'e signifika katak, ita mai tama sira nia uma, ita tenke fo hatene buat ruma. Liu husi adat ne'e mos ita husu matak malirin atu nune'e implementasaun programa ne'e labele hetan dezastre ruma durante prosesu konstrusaun.

Iha prosesu ne'e, Aplimentec Foundation servisu hamutuk ho komunidade hodi oferta fahi, bua-malus, sigaru no material adat sira seluk. Iha prosesu ne'e Lia-nain hamulak husu lisensa akompana husi Xefe Suco, comunidade no Aplimentec Foundation.

Tuir programa, prosesu konstrusaun sei hahu iha loron Segunda, 18 Febereiru 2019. Prosesu konstrusaun sei hahu uluk halo rehabilitasaun ba bee-matan. Iha programa GGP ne'e, Aplimentec Foundation sei halo rehabilitasaun ba bee-matan, konstrusaun Ferocement 10m3 rua, rehabilita tanki 30m3 ida, halo torneira publiku 14 no halo instalasaun foun ba kanu transmisaun no distribuisaun.