Coordenador Projetu ba Agricultura no Ambiente Aplimentec, Sr. Paulino Alves hateten katak, Distritu Liquica presisa tebes atensaun hosi Governo no elementu sosiade tomak, liu-liu iha sustanibilidade ba ambiente. Tuir nia, hare ba tinan 7 nia laran ona, ambiente Liquica hetan estraga makaas. Estraga sira ne'e akontense tamba povo taa ai no sunu rai iha tempu bai-loron. Nune'e bainhira iha tempu udan, halo rai monu no kria erosaun makaas iha area foho leten.
Sr. Paulino mos hatutan katak, erosaun halo ai barak mak monu no tohar, estraga dalan, no halo rai-ten iha foho leten la favoravel tan. Nune'e tuir nia observasaun, iha tinan 5 mai tan, distritu Liquica la'os infrenta erosaun ou ambiete aat deit, maibe hasoru mos krise ba be mos. "Ho aktividade ne'ebe estraga ambiente agora sei fo impaktu makas ba be matan sira iha foho leten. Tamba ai laiha, no be-matan iha fo leten mos labele conserva-an. Se nune'e, povo Liquica sei hasoru krise ba konsume be mos iha tinan hirak tuir mai", Sr. Paulino reafirma.
Nune'e, iha programa Aplimentec nian agora, tau ona reboisaun no hadia fali ambiente ne'ebe mak aat hanesan prioridade ba Apliementec hahu hosi tinan 2008 ba oin. Iha tinan ne'e nia laran, Aplimentec sei desenvolve proposta ida atu implemente reboisaun iha suco haat iha distrito Liquica hanesan Dato, Loidahar, Hatuquesi no Lukulai. Proposta ne'e sei involve comunidade atu partisipa hodi hadia sira ambiente rasik. Objetivu hosi proposta atu prevene buat hirak ne'ebe sai perigu ba ambiente distritu Liquica iha tinan hirak sei mai, nune'e mos atu eduka komunidade oin-sa atu bele konserva no fo sustanibilidade ba florestal ho ambiente (j/g).
